「埋門」遇疑似凶宅 網民即時求救
一般人買樓都會留意地區、坐向、景觀及價錢，如果一切都滿意的話，以為「終點在望」，「埋門」一腳才發現單位是疑似「凶宅」，應該如何自處？近日有準買家在討論區發帖，指自己簽約前驚現心儀單位有死亡證紀錄，但地產代理卻安慰說單位無問題，但又未能出示相關田土廳資料等等，搞到發帖者大為驚張，立即求救「全能」的網民。
發帖者稱，自己嘗試打電話去不同銀行估價，雖然結果「都唔係死人價，唔知銀行係咪是但估一估先」，甚至認為地產代理是「大陸阿姐」，質疑「求其就想我簽咗畀佢賺幾皮嘢...」令整件事更加「有可疑」。
有網民就「唔理三七廿一」斷定該單位是凶宅，「代理愈唔畀夠料，愈大可能唔妥囉！」另外，有網民指如單位「無折讓唔好買，你識Check唔代表你下手買家識去Check，第日市道差特別難甩」，甚至有人劈頭就叫發帖者「驚就唔好買」，認為將來下手買家會有相同考慮，無謂自尋煩惱。
當然拔刀相助的人亦有不少，除了教發帖者如何在網上查冊解開疑團、如何查長命契登記、與大廈保安員交流等等，亦有人指點發帖者迷津，叫發帖者「搵問米」、「如果係惡鬼就要大師出手」。又有網民發表「偉論」，稱「多數人唔係死喺醫院老人院就係屋企，為免影響樓價，第時佢地父母臨終時，可能要馬上拖出走廊或後樓梯......」嘩！講緊咩呀？拍劇嗎？
最後發帖者有否簽約、單位又是否凶宅就不得而知，但正如網民認為只要做清楚資料搜集就毋須大驚小怪，又或者「搵過第二個盤，點都好過住得唔安樂。」
事實上，今次問題亦揭示地產代理的質素問題，小記建議發帖者，不如搵個更好的代理吧，正所謂「好盤不如好AA」嘛。
